Bakuda ulag-logistika we söwda-ykdysady ulgamlarynda ikitaraplaýyn hyzmatdaşlygyň geljegi ara alnyp maslahatlaşyldy

2026-njy ýylyň 1-nji aprelinde Azerbaýjan Respublikasynyň Baku şäherinde Türkmenistanyň Ministrler Kabinetiniň Başlygynyň Orunbasary Nökerguly Atagulyýewiň Azerbaýjan Respublikasynyň Ulag, aragatnaşyk we ýokary tehnologiýalar ministri Raşad Nabiýew, Ykdysadyýet ministri Mikaýil Jabarow, “Azerbaýjan Demirýollary” Ýapyk Paýdarlar Jemgyýetiniň Başlygy Rowşan Rustamow, “Baku Halkara deňiz porty” jogapkärçiligi çäklendirilen jemgyýetiniň direktory Eldar Salahow bilen duşuşyklary geçirildi.

Duşuşyklarda meseleleriň giň toplumyna garalyp geçildi. Olaryň hatarynda:

iki ýurduň arasyndaky bar bolan ulag geçelgeleri ösdürmek; iki ýurduň deňiz portlarynyň arasyndaky hyzmatdaşlygy giňeltmek we portlaryň mümkinçiliklerini doly derejede ulanmak hem-de ýük geçirijiligini artdyrmak; üstaşyr geçelgeleri boýunça taslamalaryň üstünde bilelikde işlemek; iki ýurduň arasyndaky söwdany we haryt dolanşygyny ýokarlandyrmak we öndürilýän önümleriň görnüşlerini artdyrmak, bu babatda Hazar deňziniň mümkinçiligini doly ulanmak.

Mundan başga-da duşuşyklarda şu ýylda geçiriljek Türkmen-Azerbaýjan hökümetara toparynyň nobatdaky mejlisine deslapdan taýýarlyk görmek; iki ýurduň Işewürler toparlarynyň arasyndaky hyzmatdaşlygy has-da ösdürmek we täze ugurlaryny ýola goýmak; iki ýurduň çäginden geçýän halkara ulag-üstaşyr geçelgelerini has-da işjeňleşdirmek; Aşgabat we Baku şäherlerinde Işewürler forumyny we önümleriň sergisini gurnamaklygyň mümkinçiliklerine garamak ýaly meseleler ara alnyp maslahatlaşyldy.

Saparyň çäklerinde Türkmenistanyň Ministrler Kabinetiniň Başlygynyň Orunbasary N.Atagulyýewiň ýolbaşçylygyndaky wekiliýet Baku Halkara deňiz portyna we Alat erkin ykdysady zolagyna (AFEZ) aýlanyp gördüler we olaryň mümkinçilikleri bilen tanyşdylar.