WELOSPORTUŇ OMNİUM GÖRNÜŞİ BOÝUNÇA ÝARYŞA GATNAŞYJYLARYŇ SANY ARTDYRYLDY

WELOSPORTUŇ OMNİUM GÖRNÜŞİ BOÝUNÇA ÝARYŞA GATNAŞYJYLARYŇ SANY ARTDYRYLDY

Aşgabat 2017 Ýapyk binalarda we söweş sungaty boýunça V Aziýa oýunlarynyň çäginde geçirilýän  welosportuň omnium boýunça erkekleriň we zenanlaryň arasynda aýratynlykda geçirilýän ýaryşlara gatnaşyp biljek türgenleriň sany indi her topardan (Milli Olimpiýa komitetinden) bir däl-de iki boldy. Bu netije sportuň şu görnüşi boýunça türgenleriň sanyny has-da artdyrmak maksady bilen kabul edildi.

Çeýelik
Omnium welotrekde iň çeýe welosipedçileriň arasynda geçirilýän ýaryşdyr. Bir günüň dowamynda geçirilýän ýaryş dört aýratyn dissiplinadan ybaratdyr. Her bir dissiplina boýunça gazanylan netije soňra jemlenýär. Omnium ýaryşy ilkibaşda skretç (uzak aralyga ýaryşmak) ýaryşy bilen başlanýar (7,5 km zenanlaryň arasynda we 10 km erkekleriň arasynda), soňra tempo ýaryşy geçirilýär (7,5 km zenanlaryň arasynda we 10 km erkekleriň arasynda), soňra ýaryşyň “utulan çykar” ýaryşy we ahyrynda utukly ýaryş geçirilýär (20 km zenanlaryň arasynda we 20 km erkekleriň arasynda).

Ahyrky tapgyry, ýagny utukly ýaryşy welosipedçiler birinji üç tapgyryň netijesinde gazanan utuklar bilen başlaýarlar. Üç dissiplina boýunça birinji üç tapgyrda birinji orny eýelän türgen 40 utuk, ikinji orny eýelän türgen 38 utuk, üçünji orny eýelän türgen bolsa 36 utuk gazanýar we ş.m., 21-nji we ondan pes orny eýelän türgene 1 utuk berilýär.

Utukly ýaryş
Utukly ýaryşda welosipedçiler aýlawlary geçendigi ýa-da geçip bilmändigi sebäpli, öňki tapgyrlarda we sprintde gazanan utuklarynyň sanyny ýa artdyrýarlar ýa-da azaldýarlar. Ortaça sprintiň ýeňijilerine 5 utuk, ikinji orny eýelänlere 3 utuk, üçinji orny eýelänlere 2 utuk we dördünji orny eýelänlere 1 utuk berilýär. Ahyrky sprintde bu utuklar iki esse köpeldilýär. Her bir aýlaw üçin 20 utuk berilýär, aýlawy tamamlap bilmedik welosipedçiniň bolsa 20 utugy aýrylýar.

Erkekleriň we zenanlaryň arasynda omnium ýaryşy 23-nji sentýabrda, ýagny Aşgabat 2017-niň welosportuň trek görnüşi boýunça ýaryşynyň ahyrky gününde geçiriler.